1 Peter 2
1 所以，你等愛除掉一切个邪惡、詭詐、假冒為善、嫉妒，㧯一切譭謗人个話；
2 愛像正出世个孲𤘅仔，渴慕純淨个靈乳，使你等通過它來長大致到得救。
3 像聖經所講：「你等已經嘗過主慈愛个滋味。」
4 愛親近主，佢係生个石頭；雖然佢被人拒絕，總係上帝揀選佢，看佢做寶貝个。
5 你等也愛像生个石頭，受建造成做屬靈个聖殿，在該位做聖潔个祭司，通過耶穌基督來獻上帝所歡喜屬靈个祭物。
6 因為聖經講：𠊎擇一垤貴重个石頭，來做錫安房角个石頭；信靠佢个，絕對毋會失望。
7 對你等信个人來講，這石頭係非常寶貴个；總係，對該兜毋信个人：泥水師傅所㧒掉个這垤石頭，已經成做地基中最重要个！
8 聖經另外又講：這垤石頭會絆人个腳，係會使人跌倒个大石頭！佢等絆倒了，因為佢等毋信真道；這也係上帝个旨意。
9 總係，你等係受揀選个一族，係王个祭司，聖潔个國，上帝个子民。上帝呼召你等離開烏暗，進入佢奇妙个光明，來宣揚佢奧妙个作為。
10 你等以前毋係上帝个子民，總係這下係佢个子民；以前無得到上帝个憐憫，這下已經得到佢个憐憫。
11 親愛个朋友啊，你等在世間係旅客，係避難个人！𠊎勸你等，毋好放縱肉體个情慾；情慾從來就係攻擊靈魂个。
12 在外邦人當中，你等應當有端正个品行，使該兜講你等壞話，責備你等做壞事个人，因為看到你等个好行為，在主再來該日，會歸榮光給上帝。
13 為到主个緣故，你等愛順從世間所有个掌權者，就係在上个君王，
14 並佢所派來責罰作惡、獎勵行善个官長。
15 因為上帝个旨意係愛你等用好行為來塞死該班糊塗人無知个嘴。
16 你等愛做自由人！總係毋好用自由做邪惡个藉口；顛倒，你等愛做上帝个奴僕。
17 你等愛尊重每一個人；惜信主个兄弟姊妹；敬畏上帝；尊重君王。
18 做奴僕个，你等愛順從主人，也愛對佢等表現十分个恭敬；毋單淨對好心溫柔个主人愛恁樣，對粗暴个主人也愛恁樣。
19 若係你等看這係上帝个旨意，甘願忍受毋應該食个苦，上帝一定會賜福給你等。
20 若係你等因為犯罪來忍受責打，有麼介光榮呢？唯有因為行善來忍受苦難个人正會得到上帝个賜福。
21 上帝呼召你等个目的就係在這位；因為基督為你等受苦，留下榜樣給你等，愛使你等跈佢个腳步行。
22 佢無犯過罪；無人聽過佢講花撩。
23 佢被人辱罵無應嘴，被人虐待也無講恐嚇个話，只有仰望該照公義審判人个主。
24 基督在十字架頂親身擔當𠊎等个罪，使𠊎等既然在罪惡上死，就為到公義來生。因為佢所受个鞭傷，你等就得到醫治。
25 以前你等像迷路个羊，總係這下已經回頭，跈等你等靈魂个牧者㧯監護人了。